اسپیڈو میٹر کی غلطی نے بھارتی فاسٹ بولر بھونیشور کمار کی گیند کو تاریخ کی تیز ترین گیند بنادیا۔

غیر ملکی خبر رساں ادارے کے مطابق بھارت اور آئرلینڈ کے درمیان ہونے والے پہلے ٹی ٹوئنٹی میچ میں بڑا ہی دلچسپ نظارہ دیکھنے کو ملا، جس کو دیکھ کر کسی کو بھی اپنی آنکھوں پر یقین نہیں ہوا۔

اگر کوئی آپ سے کہے کہ بھارت کے میڈیم فاسٹ بولر بھونیشور کمار سب سے تیز گیند پھینک سکتے ہیں تو کیا آپ یقین کرسکتے ہیں؟

ایسا ہی ایک دلچسپ نظارہ بھارت اور آٗئرلینڈ کے درمیان میچ کے دوران بھارتی میڈیم فاسٹ بولر بھونیشور کمار کی گیند پر دیکھنے کو ملا جن کی گیند کی رفتار اب تک کی سب سے تیز گیند ریکارڈ کی گئی تھی۔

جب بھونیشور کمار نے گیند پھینکی تو اسپیڈو میٹر نے ان کی گیند کی رفتار 208 کلو میٹر فی گھنٹہ ظاہر کی جس کو اب تک کی سب سے تیز گیند بھی کہا جاسکتا ہے۔

دراصل یہ اسپیڈو میٹر میں آئی تکنیکی خرابی کے باعث ہوا ہے جبکہ اس سے پہلے کی گیند پر بھی اسپیڈو میٹر نے غلط رفتار 201 کلو میٹر فی گھنٹہ دکھائی تھی۔

واضح رہے کہ بھونیشور کمار ایک میڈیم فاسٹ بولر ہیں جو 130 سے 140 کلو میٹر فی گھنٹہ کی رفتار سے گیند کرواتے ہیں۔

ایسے میں آئرلینڈ کے خلاف پہلے ٹی ٹوئنٹی میچ میں اسپیڈو میٹر کے ذریعہ ان کی گیند کی رفتار 200 کلو میٹر فی گھنٹہ سے بھی زائد دکھانا ایک تکنیکی خامی ہے جبکہ اس خرابی نے بھارتی فینز کو حیران کرنے پر ضرور مجبور کردیا تھا۔

یاد رہے کہ عالمی کرکٹ میں سب سے تیز گیند پھینکنے کا ریکارڈ پاکستان کے سابق فاسٹ بولر شعیب اختر کے پاس ہے جو 161.3 کلو میٹر فی گھنٹہ کی رفتار سے گیند کرواچکے ہیں۔