سابق وفاقی وزیر خزانہ شوکت ترین کا کہنا ہے کہ آئی ایم ایف نے 440 ارب روپے کے اضافی ٹیکس لگانے کا کہا ہے جس کے بعد اصل بجٹ اب آئے گا۔

سینیٹ اجلاس میں اظہار خیال کرتے ہوئے پی ٹی آئی سینیٹر شوکت ترین نے کہا ہے کہ حکومت کی جانب سے ایک اور بجٹ آرہا ہے، آئی ایم ایف نے انہیں کہا ہے کہ 440 ارب روپے کے اضافی ٹیکس لگانے ہیں۔

سابق وفاقی وزیر خزانہ کا کہنا تھا کہ آئی ایم ایف کے مطالبے پر حکومت جب اضافی ٹیکس لگائے گی تو وہ ہی اصل بجٹ ہوگا جب کہ سینیٹ نے خانہ پوری کے لیے بجٹ پر بحث کی اور ہمارے دور میں اتنے بھی مشکل حالت نہیں تھے خاص طور پر اس طرح کی بدترین لوڈ شیڈنگ تو ہمارے دور میں نہیں ہورہی تھی جو آج کی جارہی ہے۔

بعد ازاں اسلام آباد میں پریس کانفرنس کرتے ہوئے وزیر خزانہ مفتاح اسماعیل نے کہا کہ ہم نے پیٹرول کی قیمت بڑھا کر پاکستان کو دیوالیہ ہونے سے بچایا ہے جب کہ  آئی ایم ایف کے ساتھ معاہدے میں پیش رفت ہوئی ہے، شوگر ملز پر ٹیکس بڑھا رہے ہیں، امیر لوگوں پر ٹیکس مزید بڑھایا جائے گا۔

شوکت ترین نے امپورٹڈ وزیر خزانہ مفتاح اسماعیل کی پریس کانفرنس پر ردعمل دیتے ہوئے کہا کہ بار بار کہا جاتا رہا کہ عمران خان کی حکومت معیشت پر جھوٹ بول رہی ہے، اکنامک سروے کی رپورٹ میں تحریک انصاف کی بہترین کارکردگی کی رپورٹ پر اسی حکومت نے دستخط کیے۔