اسلام آباد: بجٹ منظوری کے بعد حکومت کا آئی ایم ایف سے مزاکرات کا اگلا دور 28 جون سے شروع ہونے کا امکان ہے۔

وزارت خزانہ کے ذرائع کے مطابق عالمی مالیاتی ادارے (آئی ایم ایف) کے ساتھ مذاکرات، بجٹ منظوری کے بعد 28 جون کو متوقع ہیں جبکہ مزاکرات میں قرض معاہدے پر دستخط کیے جائیں گے۔

ذرائع کا کہنا ہے کہ پاکستان کی جانب سے وزیرخزانہ مفتاح اسماعیل اور گورنراسٹیٹ بینک معائدے پر دستخط کریں گے۔

واضح رہے کہ پاکستان نے قرض پروگرام 6 ارب ڈالرز سے بڑھا کر 8 ارب ڈالرز کرنے کی درخواست کی ہے جبکہ آئی ایم ایف سےقرض کی مدت میں ایک سال کی توسیع بھی مانگی ہے۔

پاکستان پروگرام کی مدت کو 2024 تک بڑھانا چاہتا ہے،اگلے مالی سال بجٹ کا حجم تقریباً 10 ہزارارب روپے ہوجائے گا۔

ذرائع کے مطابق پیٹرولیم مصنوعات پر11 فیصد سیلز ٹیکس یکم جولائی سے وصول کیا جائے گا جبکہ پیٹرولیم مصنوعات پر 50 روپے فی لیٹرلیوی لگانے کا فیصلہ کیا گیا ہے۔

پیٹرولیم مصنوعات پر ہرماہ 5 روپے فی لیٹر لیوی لگانے اور ٹیکس وصولیوں کا ہدف 7005 سے بڑھاکر 7450 ارب روپے کرنے پر اتفاق کیا گیا ہے۔

علاوہ ازیں کسٹم وصولی کا ہدف 950 ارب سے بڑھا کر1005 ارب کرنے پر اتفاق کیا ہے جبکہ جی ایس ٹی وصولیوں کا ہدف 3008 سے بڑھا کر 3300 ارب روپے کرنے پر بھی اتفاق کیا گیا ہے۔

ذرائع کا مزید کہنا ہے کہ انکم ٹیکس کی مد میں وصولیوں کا ہدف 55 ارب روپےکردیا گیا ہے جبکہ پالیسی فریم ورک اگلے 2 دن میں پاکستان کو دے دیا جائے گا۔