ہجےپاکستان نال کرکٹ سیریزممکن نئیں،بھارتی کرکٹ بورڈ

نيوز ڈیسک , بول نيوز

بدھ - 3اکتوبر 2018, 04:46AM

  • 146
  • کھیڈاں
prev next

 

 

انٹرنیشنل کرکٹ کونسل(آئی سی سی) ڈسپیوٹ ریزولیشن کمیٹی دے دوجے دیہاڑے دی سماعت مکمل ہو گئی ۔ ذرائع دے مطابق بھارت دا آکھنا اے کہ پاکستان دے حالات ٹھیک نئیں لہٰذا بھارتی ٹیم اوتھے نئیں جاسکدی تے پاکستان وچ 10 ورھیاں توں کوئی ٹیم نئیں آرئی۔

دبئی وچ آئی سی سی ہیڈ کوارٹر وچ ڈسپیوٹ ریزولیشن کمیٹی دی سماعت دوجے دیہاڑے وی ہوئی ۔ بھارتی کرکٹ بورڈ ولوں رتناکر شیٹھی تے بی سی سی آئی دے سابق سیکریٹری سنجے پٹیل نے مؤقف پیش کیتا۔

پاکستان نال دو طرفہ سیریز نہ کھیڈن تے بھارتی بہانے بازی جاری اے۔ بھارت نے مؤقف پیش کیتا کہ بھارتی کرکٹ ٹیم پاکستان نئیں جا سکدی اوتھے حالات ٹھیک نئیں۔

اوہناں دا آکھنا سی کہ پاکستان وچ دس ورھیاں توؓں کوئی ٹیم میچز کھیڈن نئیں گئی ۔ پاکستان نوں بھارت وچ مدعو نئیں کر سکدے کیونجے پاکستانی کھڈاریاں لئی مسئلے پیدا ہو سکدے نیں تے ایس لئی ایشیا کپ دبئی وچ کرایا۔ بھارتی حکام نے کہیا کہ ہجے پاکستان دے نال سیریز ممکن نئیں۔

ذرائع دے مطابق سماعت دے تیجے دیہاڑے دے پہلے سیشن وچ وی بھارتی حکام اپنا مؤقف پیش کرن گے۔

پاکستان ولوں طے شدہ سیریز کھیڈن توں انکار تے بھارت دے خلاف آئی سی سی ڈسپیوٹ کمیٹی وچ قنونی جنگ جاری اے جیہدے وچ پچھلے دیہاڑے سابق چیئرمین پی سی بی نجم سیٹھی بطور گواہ پیش ہوئے۔

دوناں ملکاں دے تنازع نوں سنن والا پینل مائیکل بیلوف تے جان پالسن انابیلے بینٹ اتے مشتمل اے۔

پی سی بی ولوں ہائیکورٹ دے ایڈووکیٹ خواجہ احمد حسین، لندن دے وکیل الیگزینڈروز پینادیز، پی سی بی دے جی ایم لیگل افیئر سلمان نصیر تے وکیل ابراہیم حسین نمائندگی کر رئے نیں۔

دوجیاں خبراں

Back to Top