غداری کیس:سماعت22اکتوبرتیکرملتوی

نيوز ڈیسک , بول نيوز

پیر - 8اکتوبر 2018, 06:18AM

  • 110
  • عدالت
prev next

لاہور ہائی کورٹ نے سابق وزیراعظم نوازشریف تے شاہد خاقان عباسی دے خلاف غداری دے مقدمے دے اندراج دی درخواست اتے سماعت 22 اکتوبر تیکر ملتوی کردتی۔

تفصیلاں دے مطابق لاہور ہائی کورٹ دے جسٹس مظاہر علی اکبر نقوی دی سربراہی وچ تن رکنی بینچ نے نواز شریف تے شاہد خاقان عباسی دے خلاف دائر غداری دے مقدمے لئی درخواست اتے سماعت کیتی۔

عدالت وچ سماعت شروع ہون دے باوجود نوازشریف روسٹرم تیکر نئیں اپڑ سکے ۔ سابق وزیراعظم دے وکیل اے کے ڈوگر نے عدالت وچ آکھیا کہ اسیں ویلے اتے عدالت وچ حاضر ہوندے آں۔

بعد وچ لاہور ہائی کورٹ نے سابق وزیراعظم نوازشریف تے شاہد خاقان عباسی دے خلاف غداری دے مقدمے دے اندراج دی درخواست اتے سماعت 22 اکتوبر تیکر ملتوی کردتی۔

ایس توں پہلاں اج سویرے سابق وزیراعظم نوازشریف تے شاہد خاقان عباسی لاہور ہائی کورٹ اپڑے۔

ایس موقع تے لاہور ہائی کورٹ دے آلے دوالے سیکیورٹی دے سخت انتظامات کیتے گئے تے پولیس دی وادھو نفری نوں تعینات کیتا گیا ۔

مسلم لیگ ن دے رہنما جاوید ہاشمی وی لاہور ہائی کورٹ اپڑے جدکہ کارکناں دی وڈی تعداد عدالت دے باہر مجود سی۔ مسلم لیگ ن دے قائد تے شاہد خاقان عباسی دے خلاف دائر درخواست وچ موقف اختیار کیتا گیا اے کہ نوازشریف نے ملکی سلامتی دے خلاف سرل المیڈا نوں انٹرویو دتا، نوازشریف دے بیان نال دنیا وچ پاکستان دی بدنامی ہوئی۔

لاہور ہائی کورٹ وچ دائر درخواست دے مطابق شاہد خاقان نے متنازع انٹرویو وچ نوازشریف دی مدد کیتی ، نوازشریف، شاہدخاقان عباسی، سرل المیڈا دے خلاف غداری مقدمہ درج کیتا جاوے۔

یاد روے کہ پچھلی سماعت تے لاہور ہائی کورٹ نے شاہد خاقان عباسی تے نوازشریف نوں ذاتی حیثیت وچ  طلب کردے ہوئے سرل المیڈا دا ناں ای سی ایل وچ پان تے ناقابل ضمانت وارنٹ جاری کرن دا حکم دتا سی ۔

یاد روے کہ ایس ورھے 12 مئی نوں سابق وزیراعظم نواز شریف نے مقامی اخبار نوں انٹرویو دیندے ہوئے آکھیا سی کہ ممبئی حملیاں وچ پاکستان وچ متحرک عسکریت پسند تنظیماں ملوث سی۔

بعد وچ نواز شریف دے ممبئی حملیاں توں متعلق متنازع بیان اتے قومی سلامتی کمیٹی دا ہنگامی اجلاس سابق وزیراعظم شاہد خاقان عباسی دی صدارت ہیٹھ ہویا سی جیہدے وچ نوازشریف دے بیان نوں بےبنیاد قرار دتا گیا سی تے ایہدی مذمت کیتی گئی سی۔

دوجیاں خبراں

Back to Top