معاشرےوچ استادداحترام ہوناچاہیدااے،چیف جسٹس

نيوز ڈیسک , بول نيوز

ہفتہ - 13اکتوبر 2018, 12:36PM

  • 65
  • عدالت
prev next

 

 

 چیف جسٹس آف پاکستان میاں ثاقب نثار نے عدالت وچ ریمارکس دیندے ہوئے آکھیا کہ معاشرے وچ استاد دا احترام ہونا چاہیدااے۔

 تفصیلاں دے مطابق سپریم کورٹ  لاہور رجسٹری وچ سابق وائس چانسلر تے دوجے استاداں نوں ہتھکڑیاں لان دے معاملے اتے ازخود نوٹس دی سماعت ہوئی۔

 

چیف جسٹس پاکستان نے عدالت وچ ریمارکس دیندے ہوئے آکھیا اے کہ ہتھکڑی مجاہد کامران تے پروفیسرز دی موت اے، میں استاد دی بے عزتی برداشت نئیں کراں گا۔

ڈی جی نیب لاہور سلیم شہزاد عدالت وچ پیش ہوئے جتھے عدالت نے ڈی جی نیب تے دوجے افسران توں لکھی ہوئی معافی طلب کرلیتی۔

چیف جسٹس پاکستان نے ڈی جی نیب اتے سخت غصے دا اظہار کردے ہوئے آکھیا کہ تسیں کیہڑے قنون دے مطابق استاداں دی تضحیک کیتی؟ لوکاں دی تضحیک تے  پگڑیاں اچھالن دے علاوہ تہاڈی کیہ کارکردگی اے ۔

ایہدے تے ڈی جی نیب نے آکھیا کہ اپنے اقدام اتے معافی منگدا آں ، جیہدے تے چیف جسٹس نے آکھیا کہ تسیں استاداں سنے ساری قوم تون معافی منگو ، نئیں تے تہاڈے خلاف وی مقدمہ درج کرا کے ہتھکڑیاں لاکے عدالت وچ پیش کردے آؓں ۔

ڈی جی نیب عدالت وچ آبدیدہ ہو گئے ، چیف جسٹس نے آکھیا کہ تہاڈی واری آئی تے اکھاں وچ اتھرو آگئے نیں۔

ڈی جی نیب نے عدالت  وچ اپنی صفائی دیندے ہوئے آکھیا کہ مجاہد کامران نوں سیکیورٹی خدشیاں دے پیش نظر ہتھکڑیاں لائیاں ، مجاہد کامران تے دوجے استاداں توں آپ جاکے معافی منگ لئی اے ۔

چیف جسٹس نے آکھیا کہ تسیں اک کیس وچ عدالت دے باہر آکھیا کہ کوئی گل نئیں چیف 3 مہینیاں وچ چلا جاوے گا ، تہادے متعلق بوہت چنگے تاثرات نیں پر تسیں پتا نئیں کیہ کررئے اوں، جیہناں نوں ہتھکڑیاں لائیاں ایہہ اوہ لوکی نیں جیہڑے بچیاں نوں تعلیم دیندے نیں ، رات ویڈیو ویکھ کے چیئرمین نیب نوں فون کیتا، چیئرمین نیب نے لاعملی دا اظہار کیتا تے آکھیا کہ ڈی جی نیب لاہور تہانوں مطمئن کرن گے۔

تازہ ترین خبریں