جمال خاشقجی قتل،سعودی عرب نےترک الزام ردکردتا

نيوز ڈیسک , بول نيوز

ہفتہ - 13اکتوبر 2018, 05:20PM

  • 231
  • بین الاقوامی
prev next

 

 

 سعودی عرب نے ترکی دے شہر استنبول وچ سینئر صحافی تے تجزیہ نگار جمال خاشقجی دے قتل دی منصوبہ بندی تے ایہدے وچ حکومت دے ملوث ہون دے الزاماں نوں بے بنیاد قرار دے کے رد کر دتا اے۔

تفصیلاں دے مطابق سعودی عرب دے وزیر داخلہ شہزادہ عبدالعزیز بن سعود بن نایف بن عبدالعزیز نے کجھ ذرائع ابلاغ تے حکومتاں ولوں خاشقجی دے معاملے وچ سعودی عرب نوں بدنام کرن دی شدید مذمت کیتی اے۔

اوہناں دا آکھنا اے کہ جمال خاشقجی دی گمشدگی دے حوالے نال خود سعودی عرب نوں وی تشویش اے۔ خاشقجی نوں دھوکے توں استنبول دے سفارت خانے وچ بلان ، اوہنوں اغوا کرن تے ایہدے بعد تشدد کرکے قتل کرن دے سارے الزام جھوٹ دا پلندہ نیں۔

سعودی وزیر داخلہ دا آکھنا اے کہ مملکت اتے جمال خاشقجی دے قتل دا الزام عالمی سطح تے نفرت پھیلان دی گھٹیا کوشش تے بین الاقوامی اصولاں، معاہدیاں تے عالمی قوانین دی کھلی خلاف ورزی اے۔

اوہناں دا ہور آکھنا سی کہ ریاض حکومت انقرہ دے نال رل کے خاشقجی دی پراسرار گمشدگی دا پتا چلان دی کوشش کررئی اے ۔ اوہناں دا آکھنا سی کہ ذرائع ابلاغ نوں من گھڑت کہانیاں تے افواہواں نوں پھیلا کے کسے اک ملک دے خلاف مذموم مہم دا حصہ نئیں بننا چاہیدااے۔

یاد روے کہ جمال خاشقجی دو اکتوبر نوں استنبول وچ سعودی عرب دے قونصل خانے وچ داخل ہوئے تے ایہدے بعد توں اوہ غائب نیں ۔ ذرائع ابلاغ دے مطابق خاشقجی نوں دھوکے نال قونصل خانے بلا کے قتل کردتا گیا اے۔

تازہ ترین خبریں