بھارتی وزیراعظم کرپشن سکینڈل وچ پھس گئے

نيوز ڈیسک , بول نيوز

ہفتہ - 22ستمبر 2018, 04:15PM

  • 87
  • بین الاقوامی
prev next

بھارتی وزیراعظم نریندر مودی کرپشن دے نویں سکینڈل وچ پھس گئے نیں ، سکینڈل وچ فرائس توں رافیل طیارے خریدن دا تنازع سامنے آیا اے۔

بھارتی میڈیا دے مطابق فرانس دے سابق صدر فرانسوآ اولاند نے انکشاف کیتا اے کہ بھارت نے 11 کھرب روپیے مالیت دے 36 رافیل لڑاکا طیاریاں دی خریداری لئی بزنس مین انیل امبانی دی دیوالیہ کمپنی نوں پارٹنر بنان دی تجویز دتی سی۔

سابق فرانسیسی صدر دے انکشاف دے بعد بھارتی سیاست وچ ہلچل مچ گئی اے تے اپوزیشن جماعت کانگریس دے صدر راہول گاندھی وی مودی سرکار اتے ور پئے نیں۔

راہول گاندھی نے آکھیا اے کہ انیل امبانی دی کمپنی 45 ہزار کروڑ روپیے دے قرض وچ ڈُبی ہوئی سی تے ایہدی مدد لئی ای نریندر مودی نے رافیل طیاریاں دے معاہدے دا سہارا لیتا۔

اوہناں دا آکھنا سی کہ بھارتی عوام دے دماغ وچ ایہہ گل اے کہ وطن دا چوکیدار چور اے تے سابق فرانسیسی صدر نے وی ساڈے وزیراعظم نوں چور آکھیا اے۔

راہول گاندھی دے مطابق مودی نوں فرانسیسی صدر دے بیان دی تصدیق یا تردید کرنی چاہیدی اے پر سانوں مکمل یقین اے کہ بھارتی وزیراعظم نریندر مودی کرپٹ نیں۔

یاد روے کہ ایس توں پہلاں نریندر مودی دے یار تے نکے مودے دے ناں توں مشہور ہیریاں دے تاجر نیرو مودی دے اثاثے ڈیڑھ کھرب روپیے دے فراڈ دے الزام وچ منجمد کر دتے گئے سن۔

بھارت دی اپوزیشن جماعتاں ولوں اوس ویلے وی الزام لایا گیا سی کہ چھوٹے مودی نوں نریندر مودی دی حمایت حاصل اے تے اوہنوں ملک توں فرار کران وچ وی بھارتی وزیراعظم ای دا ہتھ اے۔

دوجیاں خبراں

Back to Top