نواز شریف دےخلاف ریفرنسز، احتساب عدالت نوں17 نومبر دی مہلت

نيوز ڈیسک , بول نيوز

جمعه - 12اکتوبر 2018, 06:20AM

  • 210
  • عدالت
prev next

سپریم کورٹ آف پاکستان نے احتساب عدالت نوں سابق وزیراعظم نواز شریف دے خلاف العزیزیہ اسٹیل ملزتے فلیگ شپ انویسٹمنٹ ریفرنسز دا ٹرائل پورا کرن لئی17 نومبر تک دی مہلت دے دتی۔

چیف جسٹس آف پاکستان جسٹس ثاقب نثار دی سربراہی وچ سپریم کورٹ دے 3 رکنی بنچ نے اج مذکورہ درخواست تے سماعت کیتی۔

نواز شریف دے وکیل خواجہ حارث سپریم کورٹ وچ پیش ہوئے تے 6 ہفتوں تک مہلت دین  دی استدعا کیتی پر عدالت عظمیٰ نے ریمارکس دتے کہ 4 ہفتیاں توں ودھ دی مہلت نئیں دتی جا سکدی۔

خواجہ حارث نے سپریم کورٹ توں استدعا کیتی  کہ اک وار تے میری گھل وی من لئی جاوے۔ جیہدے اتے چیف جسٹس نے ریمارکس دتے کہ 'ہمیشہ تہاڈی گل منی پر ایہہ  تاثر دتا گیا کہ تہاڈی گل نئیں منی'۔

نال ای جسٹس ثاقب نثار نے ریمارکس دتے ایہہ اوہ کیس اے جیس نے دو بھراواں وچ تلخی پیدا کیتی۔چیف جسٹس دا ہور کہنا سی کہ تسی چاہو تے ہفتے تے اتوار نوں وی کم کر سکدے آں۔  17 نومبر تک کیساں دا فیصلہ نہ ہویا تے عدالت اتوارنوں وی لگے گی۔

چیف جسٹس نے کہیا جے ایس مدت وچ کیساں دا فیصلہ نہ ہویا تے احتساب عدالت دے جج توں  پچھاں گے۔

سماعت دے بعد چیف جسٹس نے دونواں ریفرنسز دے ٹرائل لئی 17 نومبر تک دی مہلت دیندیاں ہویاں ریمارکس دتے کہ ایہہ آخری توسیع اے تے ایہدے توں بعد کوئی توسیع نئیں دتی جاوے گی۔

یاد رہوے کہ نواز شریف دے خلاف 2 نیب ریفرنسز دا ٹرائل پورا کرن لئی  سپریم کورٹ ولوں احتساب عدالت نوں دتی جان والی آخری مدت 7 اکتوبر نوں پوری ہوئی سی جیہدت توں بعد احتساب عدالت نمبر 2دے جج ارشد ملک نے سپریم کورٹ نوں ٹرائل دی مدت وچ توسیع لئی خط لکھیا سی۔

یادرہوے کہ سپریم کورٹ نے پاناما کیس دی روشنی وچ احتساب عدالت نوں شریف ٹبر دے خلاف 3 ریفرنسز دا ٹرائل پورا کرن لئی 6 مہینیاں دا ویلا دتا سی جیہدے وچ 6 وار توسیع کیتی جا چکی اے۔

 

دوجیاں خبراں

Back to Top