ڈی پی اوپاکپتن تبادلہ کیس،چیئرمین نیکٹادی رپورٹ پیش

نيوز ڈیسک , بول نيوز

بدھ - 3اکتوبر 2018, 06:29AM

  • 391
  • عدالت
prev next

ڈی پی او پاکپتن تبادلہ کیس وچ چیئرمین نیکٹا دی رپورٹ سپریم کورٹ وچ پیش کر دتی گئی۔ عدالت نے سارے فریقاں نوں اک ہفتے وچ رپورٹ تے موقف پیش کرن دا حکم دے دتا اے۔

تفصیلاں دے مطابق خالق داد لک دی رپورٹ وچ آکھیا گیا اے کہ ڈی پی او نوں سبق سکھان لئی آئی جی اتے دباؤ پایا گیا ، آئی جی کلیم امام شاہ توں ودھ شاہ دے وفادار نکلے، آئی جی دا موقف سی شفاف انکوائری لئی تبادلہ کیتا ، حیرانی دی گل اے تبادلے دے نال ای انکوائری دا حکم نئیں دتا گیا، ایس گل دی وجہ توں شک پیدا ہورئیا اے ۔

چیف جسٹس میاں ثاقب نثار نے ریمارکس دتے کہ فریق اک ہفتے وچ رپورٹ اتے موقف پیش کرن ، ایس معاملے وچ آرٹیکل 62 ون ایف دا تناظر وی ویکھن ، ایڈووکیٹ جنرل پنجاب، آرٹیکل 62 ون ایف نوں تعویز بنا کے باں تے بنھ لین ، اج احسن اقبال جمیل معافی مانگ رئیا اے پہلے ایہدی ٹون ای ہور سی ، کیوں نہ احسن جمیل گجر تے انسداد دہشتگردی عدالت وچ مقدمہ چلایا جاوے۔

سماعت دے دوران خاور مانیکا دیاں اکھاں وچ اتھرو آ گئے ، کیہ میں سابق بیوی یا عمران خان نال گل کردا ؟ میرے بالاں نال بدسلوکی ہوئی۔ چیف جسٹس خاور مانیکا نال مکالمہ کردے ہوئے آکھیا کہ جذباتی ہون دی کوئی لوڑ نئیں۔

 

ایڈووکیٹ جنرل پنجاب نے کہیا ایہہ کیس خاندانی معاملیاں توں متعلق اے ، جیہدے تے چیف جسٹس نے کہیا وزیراعلیٰ اجنبی بندے نوں بٹھا کے آکھدے نیں ڈی پی او نال گل کرو ۔ ایڈووکیٹ جنرل پنجاب نے کہیا ایس چیز نوں قبول نئیں کیتا جاسکدا ۔ چیف جسٹس نے کہیا احسن جمیل اج جھک کے کھلوتے نیں پہلے دیہاڑے اکڑ کے کھلوتے سن۔

یاد روے کہ ڈی پی او پاکپتن تبادلے توں متعلق اوس ویلے دے آئی جی پنجاب کلیم امام نے عدالت وچ رپورٹ جمع کرائی سی ، جیہدے وچ کسے نوں وی ذمے وار نئیں قرار دتا گیا سی ، سپریم کورٹ نے اوس رپورٹ نوں رد کردے ہوئے سینئر پولیس افسر خالق داد لک نوں انکوائری دی ذمے واری دتی سی۔

سپریم کورٹ نے ڈی پی او پاکپتن دے تبادلے اتے سیاسی اثرورسوخ توں متعلق رپورٹ طلب کر رکھی سی تے آکھیا سی کہ سربراہ نیکٹا، وزیراعلیٰ پنجاب ولوں اثرورسوخ تے عدالت وچ رپورٹ جمع کران  گے۔

دوجیاں خبراں

Back to Top