آشیانہ ہاؤسنگ کیس،شہبازدا10روزہ ریمانڈمنظور

نيوز ڈیسک , بول نيوز

ہفتہ - 6اکتوبر 2018, 07:12AM

  • 207
  • قومی
prev next

 

 

احتساب عدالت نے پچھلے دیہاڑے گرفتار کیتے گئے مسلم لیگ نواز دے صدر شہباز شریف دا 10 دیہاڑیاں دا جسمانی ریمانڈ منظور کردے ہوئے نیب دے حوالے کر دتا ۔

تفصیلاں دےمطابق نیب نے سابق وزیراعلیٰ پنجاب تے قومی اسمبلی وچ قائد حزب اختلاف شہباز شریف دے 15 دیہاڑیاں دے جسمانی ریمانڈ دی درخواست کیتی جیہدے تے احتساب عدالت نے شہباز شریف نوں 10 روزہ جسمانی ریمانڈ منظور کر لیتا۔

آشیانہ ہاؤسنگ کیس وچ گرفتار مسلم لیگ نواز دے صدر شہباز شریف نوں اج احتساب عدالت وچ پیش کیتا گیا۔

لاہور دی احتساب عدالت دے جج نجم الحسن نے اپنے چیمبر وچ آشیانہ اقبال ہاؤسنگ سکینڈل کیس دی سماعت شروع کیتی تانجے میاں شہباز شریف نے عدالت توں استدعا کیتی کہ میں کیس دی سماعت کھلی عدالت وچ چاہندا آں ، جج دے چیمبر دے اندر نئیں چاہندا ، ایس لئی سماعت کمرہ عدالت وچ کیتی جاوے ، جیہدے اتے کیس دی سماعت جج دے چیمبر توں کمرۂ عدالت منتقل کر دتی گئی۔

کمرۂ عدالت وچ میاں شہباز شریف دے پتر حمزہ شہباز تے سلمان شہباز وی مجود سن۔

نیب نے الزام عائد کیتا کہ سابق وزیر اعلیٰ پنجاب میاں شہباز شریف نے اختیارات توں ودھ کے کم کیتا ۔

جیہدے تے شہباز شریف نے آکھیا کہ میرے خلاف سارے مقدمے جھوٹے تے بےبنیاد نیں۔

پراسیکیوٹر نیب نے کہیا کہ شہباز شریف نے آشیانہ اقبال دا کنٹریکٹ لطیف اینڈ سنز توں منسوخ کر کے کاسا ڈیولپرز نوں دتا ، اوہناں دے غیرقنونی اقدام توں قومی خزانے نوں کروڑاں روپیے دا نقصان ہویا۔

شہباز شریف نے عدالت وچ بیان دتا کہ میں اپنی ذاتی مداخلت نال کئی ارب روپیے بچائے، اورنج لائن ٹرین وچ صوبے وچ 75 ارب روپیے بچائے۔

اوہناں نے اپنے بیان وچ ہور آکھیا کہ میں اپنیاں نیندراں تے صحت خراب کیتی، دن رات محنت کرکے عوام دی خدمت کیتی ، ایہہ مقدمہ سیاسی بنیاد اتے بنایا گیا اے ، میں اک دھیلے یا اک پائی دی کرپشن نئیں کیتی۔

پراسیکیوٹر نیب نے عدالت توں استدعا کیتی کہ شہباز شریف توں ہور تفتیش درکار اے، جیہدے لئی عدالت اوہناں نوں جسمانی ریمانڈ تے نیب دے حوالے کرے۔ شہباز شریف دے وکیل نے ایس موقع تے نیب دی درخوست دی مخالفت کیتی۔

احتساب عدالت نے شہبازشریف دا 10 روزہ جسمانی ریمانڈ منظور کردے ہوئے کیس دی سماعت 16 اکتوبر تیکر ملتوی کردتی۔

شہبازشریف نوں سماعت دے بعد انتہائی سخت سیکیورٹی وچ بکتربند گاڑی وچ احتساب عدالت توں ٹوریا گیا۔

دوجیاں خبراں

Back to Top